कोल्हापूर : गेल्या दीड वर्षापासून जगभरात कोरोनाची भयंकर स्थिती निर्माण झाली आहे. कोरोनाच्या गंभीर परिस्थितीमुळे अर्थचक्र थांबले असून याचा फटका समाजातील सर्वच घटकांना बसला असून अनेकांचा रोजीरोटीचा प्रश्न निर्माण झाला आहे. अशा सर्वांना उदरनिर्वाहासाठी तारेवरची कसरत करावी लागत आहे. मराठी चित्रपट सृष्टीतील सिने-नाट्य कलाकार, तंत्रज्ञ आणि कामगार याला अपवाद राहिले नाहीत. कोल्हापूर हे चित्रपट सृष्टीचे माहेर घर म्हणून ओळखले जाते याठिकाणी हजारोंच्या संख्येने चित्रपट सृष्टीशी निगडीत उदरनिर्वाह करणारे लोक आज मात्र रोजगार उपलब्ध नसल्याने संकटात सापडले आहेत. भारतीय जनता पार्टीच्यावतीने कोरोना संकटकाळात “सेवा ही संघटन” या माध्यमातून समाजातील प्रत्येक घटकाला मदत करण्याचे कार्य भाजपा प्रदेशाध्यक्ष आमदार चंद्रकांतदादा पाटील यांच्या मार्गदर्शनाखाली सुरु आहे.आज भाजपा कार्यालय बिंदू चौक येथे सिने-नाट्य कलाकार, तंत्रज्ञ आणि कामगार यांना भाजपा प्र.का.सदस्य महेश जाधव, भाजपा जिल्हाध्यक्ष राहूल चिकोडे, संघटन सरचिटणीस अशोक देसाई यांचे हस्ते धान्य कीटचे वितरण करण्यात आले. याप्रसंगी सरचिटणीस दिलीप मेत्राणी, हेमंत आराध्ये, गणेश देसाई, भाजपा चित्रपट कामगार आघाडी प्रदेश उपाध्यक्ष महादेव साळोखे, भाजपा चित्रपट आघाडी कोल्हापूर जिल्हा अध्यक्ष मंगेश लिंगनूरकर, कोल्हापूर जिल्हा सहप्रभारी सौ सुषमाताई ठाकूर यांची प्रमुख उपस्थिती होती. याप्रसंगी बोलताना भाजपा प्र.का.सदस्य महेश जाधव यांनी आजपर्यंत भारतीय जनता पार्टीच्या माध्यमातून केलेल्या कामांचा आढावा उपस्थित लोकांना दिला त्याचबरोबर यापुढे देखील संकट काळामध्ये भारतीय जनता पार्टी सदैव कार्यरत राहून आपल्या सोबत असल्याचे सांगितले.जिल्हाध्यक्ष राहूल चिकोडे म्हणाले, सरकारच्या माध्यमातून कोरोनाच्या संकट काळामध्ये गोर-गरीब जनतेसाठी आवश्यक ती मदत पोचत नाही. भारतीय जनता पार्टी आणि भाजपा प्रदेशाध्यक्ष आमदार चंद्रकांतदादा पाटील यांच्या माध्यमातून संपूर्ण महराष्ट्रभर समाजातील वंचित घटकांना अशा विविध उपक्रमाच्या माध्यमातून मदत करण्याचा उद्देश असून यापुढे देखील असे उपक्रम सुरु राहणार असल्याचे त्यांनी सांगितले.
Leave a Reply