तिकीट मिळण्यासाठी पळापळ करणारे जनतेचे प्रश्न काय सोडवणार? आ.सतेज पाटील

कोल्हापूर: जे जे महायुतीत गेले त्यांना आता निवडणूक जाहीर झाल्यानंतर तिकिटासाठी पळापळी करावी लागत आहे. एकीकडे महाविकास आघाडीचा उमेदवार निश्चित होऊन त्यांच्या प्रचार कार्यालयाचे उद्घाटन होत असताना अजूनही महायुतीचा उमेदवार याबद्दल साशंकता आहे. तिकिटासाठी पळापळ कराव्या लागणाऱ्यांना जनतेचे प्रश्न सोडवण्यासाठी कुठे वेळ असणार आहे? आणि ते जनतेचे काय प्रश्न सोडवणार? असा सवाल काँग्रेसचे आमदार सतेज पाटील यांनी केला. श्रीमंत शाहू छत्रपती महाराज यांच्या प्रचार कार्यालयाच्या उद्घाटन प्रसंगी ते बोलत होते.कोल्हापूर लोकसभा मतदारसंघातील इंडिया आघाडी व महाविकास आघाडीतर्फे राष्ट्रीय काँग्रेसचे अधिकृत उमेदवार आदरणीय श्रीमंत शाहू छत्रपती महाराज यांच्या निवडणूक प्रचार मध्यवर्ती कार्यालयाचा उद्घाटन समारंभ छत्रपती शिवाजी महाराज स्टेडियम येथे कॉम्रेड बी.एल. बरगे यांच्या हस्ते पार पडला.याप्रसंगी आमदार ऋतुराज पाटील, आमदार जयश्री जाधव, शिवसेनेचे सहसंपर्क प्रमुख विजय देवणे, जिल्हाप्रमुख संजय पवार, राष्ट्रवादीचे जिल्हाध्यक्ष व्ही. बी. पाटील, शहराध्यक्ष आर.के.पोवार, काँग्रेसचे शहराध्यक्ष सचिन चव्हाण यांच्यासह माजी नगरसेवक, इंडिया आघाडीतील सर्व घटक पक्षांचे नेते, विविध संघटनांचे पदाधिकारी व कार्यकर्ते उपस्थित होते.