महाडीकांनी राजाराममध्ये बोगस सभासद केले : बयाजी शेळके

असळज : राजाराम कारखान्याच्या सभासदांची दिशाभूल करण्याचे काम महाडिक कंपनी सातत्याने करत आहे. अमल महाडिक यांनी गगनबावड्यातील साखरी गावातील आपली जमीन 2 लाख रुपये घेऊन 10 वर्षासाठी घानवट दिली आहे. त्याआधारे चावरे गावातील 58 लोकांना बोगस सभासद करुन महाडीकांनी लबाडी केली, असा आरोप गोकुळचे संचालक बयाजी शेळके यांनी केला. राजर्षी छ. शाहू परिवर्तन आघाडीच्यावतीने असळज येथे झालेल्या गगनबावडा तालुक्यातील सभासदांच्या प्रचारसभेत ते बोलत होते. यावेळी आमदार सतेज पाटील यांची प्रमुख उपस्थिती होती.
बयाजी शेळके म्हणाले, अमल महाडिकांनी साखरीतील 386 गट नंबरमध्ये 118 गुंठे खोडवा पिकात 58 सभासद केले आहेत. सातबारावर 2015-16 ते 2021-22 मध्ये गवत व गवतपड नोंद असलेल्या या क्षेत्रात 2022-23 मध्ये लागण करायच्या आधी थेट खोडवा पिकाची नोंद केली आहे. खोटे बोल पण रेटून बोल अशी महाडीकांची भूमिका सातत्याने राहिली आहे. लबाडी हाच महाडीकांचा धंदा आहे.
अमल महाडिक सातत्याने पोटनियमांचा अभ्यास करा म्हणतात मग, साखरीतील 118 गुठ्यांत 58 सभासदांची नोंद तुम्ही कशी केली? दोन गुंठे क्षेत्रावर सभासद होता येते का? साखरीतील या क्षेत्रावर धडधाकट माणसालासुध्दा चालत जाता येणार नाही अशा डोंगरात ही जमिन आहे. या ठिकाणी उसाचा तर पत्ताच नाही. महाडिकांनी षडयंत्र करून बोगस सभासद केले आहेत. या लबाड टोळीला मुळासकट उखडून टाकून त्यांना येलूरचा रस्ता दाखवा असे आवाहन शेळके यांनी केले.कारखान्याचे संचालक मानसिंग पाटील म्हणाले, गगनबावडा तालुक्यासाठी व कारखान्यासाठी डी. वाय. दादांनी दिलेले योगदान व त्यांच्या ऋणातून मुक्त होण्यासाठीच सर्व सभासदांनी कारखान्याला त्यांचे नाव दिले. त्यामुळे डी. वाय. पाटील कारखान्याची बदनामी गगनबावडातील जनता सहन करणार नाही. 2014 व 2019 च्या निवडणुकीत गगनबावडा तालुक्याची ताकद महाडीकांनी अनुभवली आहे. या निवडणुकीतही तालुक्याची ताकद त्यांना दाखवून देऊ.आमदार सतेज पाटील म्हणाले, जन्मभूमी कसबा बावडाबरोबरच कर्मभूमी गगनबावडाही माझ्या पाठीशी खंबीरपणे उभी आहे. गेल्या 25 वर्षाच्या माझ्या यशात कसबा बावडाबरोबरच गगनबावड्याचाही सिंहाचा वाटा आहे. मागील निवडणुकीप्रमाणेच राजाराम कारखान्याच्या निवडणूकीत तालुक्याची ताकद दाखवून परिवर्तन पॅनेला विजयी करा.

माजी अध्यक्ष सर्जेराव माने म्हणाले, निवडणूक समोर आहे म्हटल्यावर नेहमीप्रमाणे महाडीक आश्वासनांचा पाउस पाडत आहेत.
यावेळी डी. वाय. पाटील कारखान्याचे संचालक सहदेव कांबळे, बजरंग पाटील, दिगंबर मेडसिंगे, नंदकुमार चौगले, शिवसेना उपजिल्हाप्रमुख बाजीराव पाटील यांनी मनोगत व्यक्त केले. संभाजी पाटणकर, कारखान्याचे उपाध्यक्ष बंडोपंत कोटकर, संचालक चंद्रकांत खानविलकर, संजय पडवळ, महादेव पडवळ, उदय देसाई, जयसिंग ठाणेकर, अभय बोभाटे, पांडुरंग पडवळ, रामा जाधव, रामचंद्र पाटील, विलास पाटील, प्रकाश देसाई, संभाजी कुंभार, निवास पाटील, सचिन चव्हाण, सुनिल मोदी, उमेदवार दगडू चौगले, पुतळाबाई मगदूम, सचिन नरसगोंडा पाटील, प्रकाश मेंगाणे यांच्यासह तालुक्यातील सभासद मोठ्या संख्येने उपस्थित होते.