पुरातत्व खात्याने अतिक्रमण काढण्यास तयारी दर्शवल्यास पोलीस बंदोबस्त पुरवू: जिल्हाधिकारी

कोल्हापूर : विशाळगडाच्या अतिक्रमणाच्या संदर्भात जे निवेदन तुम्ही दिले आहे. त्या संदर्भात मी स्वत: पहाणी करतो. याविषयी पुरातत्व खात्याला पत्र लिहून स्पष्टीकरण मागवू. हे अतिक्रमण मुख्यत्वेकरून ज्या विभागाच्या अंतर्गत येते त्या पुरातत्व खात्याने यावर कारवाई करणे अपेक्षित आहे. अतिक्रमण काढण्यास पुरातत्व खात्याची तयारी असल्यास आम्ही पोलीस बंदोबस्त पुरवू. या संदर्भात पुरातत्व खात्याच्या राज्य संचालकांशी बोलू, असे आश्‍वासन कोल्हापूरचे जिल्हाधिकारी दौलत देसाई यांनी दिले. विशाळगड रक्षण आणि अतिक्रमणविरोधी कृती समितीने १९ मार्च या दिवशी जिल्हाधिकारी दौलत देसाई यांची भेट घेऊन त्यांना निवेदन सादर केले. त्या वेळी हे आश्‍वासन त्यांनी दिले. या वेळी शिवसेनेचे उपजिल्हाप्रमुख श्री. संभाजीराव भोकरे, शिवसेनचे श्री. किशोर घाटगे, मलकापूर येथील हिंदुत्वनिष्ठ श्री. रमेश पडवळ, विशाळगड रक्षण आणि अतिक्रमणविरोधी कृती समितीचे प्रवक्ता श्री. सुनील घनवट, समन्वयक श्री. किरण दुसे, हिंदुत्वनिष्ठ श्री. रामभाऊ मेथे, हिंदु जनजागृती समितीचे श्री. शिवानंद स्वामी, श्री. बाबासाहेब भोपळे, भाजपचे श्री. सतीश पाटील आणि श्री. उत्तम पाटील उपस्थित होते.