माजी नगरसेवक सतीश लोळगे यांचा, सतेज पाटील गटात जाहीर प्रवेश..

कोल्हापूर : माजी नगरसेवक सतीश लोळगे हे स्वगृही परतले असून त्यांचा योग्य सन्मान राखला जाईल. अशी ग्वाही आमदार सतेज पाटील यांनी दिली. माजी नगरसेवक सतीश लोळगे यांचा वाढदिवस आज (गुरुवारी) आमदार सतेज पाटील यांच्या उपस्थितीत साजरा करण्यात आला. यावेळी त्यांनी भाजपला रामराम करून, सतेज पाटील गटात आपल्या कार्यकर्त्यासह जाहीर प्रवेश केला. याप्रसंगी आम.सतेज पाटील बोलत होते.

माजी नगरसेवक सतीश लोळगे यांची एक चांगला कार्यकर्ता म्हणून ओळख आहे. सर्व सामन्यांचे प्रश्न घेवून धडपडणारा कार्यकर्ता आपल्या सोबत रहावा ही आपली देखील इच्छा होती. कळंबा फिल्टर हाऊस या प्रभागात गेल्या पाच वर्षात कोट्यावधींची विकास कामे झाली आहेत. यापुढे देखील माजी नगरसेवक सतीश लोळगे यांच्या माध्यमातून विकासाचा रथ असाच पुढे सुरु राहील अशी ग्वाही देखील आमदार सतेज पाटील यांनी यावेळी बोलताना दिली. महानगरपालिकेची सर्वसाधारण सभा शुक्रवारी होणार आहे, सर्वांचे मत घेवून माजी नगरसेवक लोळगे यांन एखादे पद देण्याबाबत निश्चित पणे निर्णय घेतला जाईल असेही ते म्हणाले. या कार्यक्रमाला महापौर स्वाती येवलुजे, उपमहापौर सुनील पाटील, स्थायी सभापती संदीप नेजदार, गट नेता शारंगधर देशमुख, माजी नगरसेवक मधुकर रामाणे,सचिन चव्हाण, दुर्वास कदम, राजू साबळे यांच्यासह कार्यकर्ते उपस्थित होते.