गांधी मैदान विकासासाठी १९ कोटीचा निधी द्या : आ.जयश्री चंद्रकांत जाधव यांची मुख्यमंत्र्यांकडे मागणी

कोल्हापूर : गांधी मैदानाच्या सर्वांगीण विकासासाठी १९ कोटी रुपयांच्या निधीची मागणी आमदार जयश्री चंद्रकांत जाधव यांनी मुख्यमंत्री एकनाथ शिंदे यांच्याकडे निवेदनाद्वारे केली आहे.आज नागपूर येथे सुरू झालेल्या हिवाळी अधिवेशनाच्या पहिल्या दिवशी आमदार जाधव यांनी मुख्यमंत्री शिंदे यांची भेट घेतली आणि गांधी मैदानाच्या सर्वांगीण विकासासाठी निधी मागणीचे निवेदन दिलेयावेळी मुख्यमंत्री शिंदे यांनी कोल्हापूरातील गांधी मैदानाच्या सर्वांगीण विकासासाठी निधी देण्याचे आश्वासन दिले. महाराष्ट्र राज्यात खेळाडू व क्रिडा संस्कृतिला चालना देणारे शहर म्हणून कोल्हापूरची ओळख आहे. देशाच्या विविध भागातील खेळाडू कोल्हापूरमध्ये सरावासाठी येतात. कुस्ती, फुटबॉल, जलतरण, नेमबाजी, हॉकी, बास्केटबॉल, स्फॉटबॉल, क्रिकेट, कबड्डी, खो-खो, वेटलिफ्टिंग, शरीरसौष्ठव, रबी, तलवारबाजी, मैदानी स्पर्धा ( अॅथलटीक्स) अशा सर्व क्रिडा प्रकारात कोल्हापूर राज्य, देशासह जगात चमकले आहे. कोल्हापूरातील क्रिडा संस्कृतीला चालना देण्यासाठी खेळाडुंना प्रोत्साहन व सरावासाठी पाठबळ देणे गरजेचे आहे व राज्य सरकारचे कर्तव्य आहे. यासाठी मैदानाचा सर्वांगीण विकास करणे गरजेचे आहे.क्रिडा प्रशिक्षण, क्रिडा विज्ञान, क्रिडा तंत्रज्ञान, क्रिडा व्यवस्थापन आणि आधुनिक क्रिडा सुविधा खेळाडुंना मैदानावर उपलब्ध झाल्यास, खेळाडुंना कसून सराव करता येईल. सराव चांगला झाला तरच खेळाडुकडून विविध स्पर्धेत चमकदार कामगिरी होईल. यामुळे कोल्हापूरातील गांधी मैदानाचा सर्वागीण विकास करावा, अशी मागणी खेळाडू व क्रिडा प्रेमी नागरिकांतून होत आहे. गांधी मैदानावर पावसाळ्यात पावसाचे पाणी साचून राहते. परिणामी मैदानाला तळ्याचे स्वरूप येते. त्यामुळे गांधी मैदाना वरील पावसाचे पाणी व सांडपाण्याचे निर्गतीकरण करणे गरजेचे आहे.त्यामुळे गांधी मैदानाच्या सर्वांगीण विकासासाठी व मैदानात विविध सोयी-सुविधा उपलब्ध करून देण्याकरीता दिवंगत आमदार चंद्रकांत जाधव यांनी आराखडा तयार करून घेतला आहे. या आराखड्यात मैदानावर येणारे सांडपाण्याचा निर्गतीकरणासह खेळासाठी विविध सोयी-सुविधाचा समावेश आहे. हा आराखडा महापालिकेकडे सादर केला असून, यासाठी सुमारे १९ कोटी रुपये निधीची आवश्यकता आहे. त्यामुळे गांधी मैदानासाठी टप्प्याटप्प्याने १९ कोटी रुपयांचा निधी मंजूर करावा, अशी मागणी आमदार जाधव यांनी केली आहे.कोल्हापूरातील खेळाडूमध्ये गुणवत्ता आहे. खेळाडूंना सरावासाठी उत्तम सुविधा मिळाल्या, तर कोल्हापूरचा खेळाडू जागतिक स्तरावर चमकदार कामगिरी करू शकतो. यामुळेच गांधी मैदानाच्या विकासासाठी सरकारकडे निधीची मागणी केली असून, मुख्यमंत्री एकनाथ शिंदे यांनी निधी देण्याचे आश्वासन दिल्याचे आमदार जाधव यांनी सांगीतले.