वीज बिलांच्या विरोधात ‘आप’ मांडणार पालकमंत्र्यांच्या कार्यालयासमोर ठिय्या

कोल्हापूर:लॉकडाउनमुळे सर्वसामन्यांवर आर्थिक ताण वाढला आहे. त्यातच महावितरण वीज कंपनीने विजेचे दर वाढवल्यामुळे नागरिकांचे कंबरडे मोडले आहे. ‘आप’च्या वतीने वेळोवेळी निवेदन सादर करून, विजबिलांची होळी करून तसेच एक दिवसीय लाक्षणिक उपोषण करून विजबिलांमधील दरवाढ मागे घेण्याचे आवाहन केले होते.तसेच आम आदमी पार्टीच्या वतीने लॉकडाउन काळातील प्रतिमहिना 200 युनिट वीजबिल माफ व्हावे या मागणीला पाठिंबा म्हणून नागरिकांसाठी मिस्ड कॉल मोहीम सुरू करण्यात आली होती, त्यामध्ये कोल्हापूर जिल्ह्यातील 8500 ग्राहकांनी मिस्ड कॉल देऊन विरोध दर्शविला.परंतु या सगळ्या आंदोलनांची कोणतीच दखल अद्याप राज्य शासनाने घेतली गेलेली नाही. मागील भाजप सरकारप्रमाणेच फक्त आश्वासन देऊन ‘झुलवत’ ठेवण्याचं काम महाविकास आघाडीचे सरकार करत आहे. नागरिकांची आर्थिक परिस्थिती बिकट आहे हे समोर दिसत असताना देखील ऊर्जामंत्री नितीन राऊत यांच्या मनाला पाझर फुटत नाही आहे. निदान आमच्या पालकमंत्र्यांनी सांगितल्यावर त्यांच्या मनाला पाझर फुटेल या अपेक्षेने व जनतेच्या मनातला रोष प्रकट करण्यासाठी आम आदमी पार्टीच्या वतीने ताराबाई पार्क येथील पालकमंत्री मा. सतेज पाटील यांच्या कार्यलयासमोर धरणे धरत ठिय्या आंदोलन करण्यात येणार अशी माहिती आम आदमी पार्टीचे पश्चिम महाराष्ट्र अध्यक्ष संदीप देसाई यांनी पत्रकार परिषदेत दिली.या ठिय्या आंदोलनाच्या माध्यमातून खालील मागण्या करण्यात येत आहेत:

1. लॉकडाउन काळातील प्रति महिना 200 युनिट वीजबिल माफ झालेच पाहिजे.

2. विजबिलांची स्लॅब दरवाढ रद्द झालीच पाहिजे.

3. वीजबिलातील वाढीव वहन आकार रद्द झालाच पाहिजे.

4. लॉकडाउन काळातील वीजबिल ज्या ग्राहकांनी भरले आहे त्यांच्या बिलांच्या रक्कमेतील फरक पुढील बिलातून वजा केला पाहिजे.जोपर्यंत दरवाढ मागे घेतली जात नाही व वरील मागण्या मान्य होत नाहीत तोपर्यंत नागरिकांनी बिले भरू नयेत असे आवाहन आम आदमी पार्टीच्या वतीने करण्यात आले आहे. या असहकार आंदोलनात पालकमंत्र्यांनी देखील सामील होऊन स्वतःचे कार्यालयाचे व घराचे बिल न भरून नागरिकांच्या भावना राज्य सरकार पर्यंत पोहचवाव्यात अशी मागणी ठिय्या द्वारे करण्यात येणार आहे.ठिय्या आंदोलन रविवार दिनांक 9 ऑगस्ट रोजी दुपारी 12 वा. सुरू होणार असून कोरोनाच्या पार्श्वभूमीवर शारीरिक अंतर पाळून करण्यात येणार आहे.यावेळी पश्चिम महाराष्ट्र अध्यक्ष संदीप देसाई, जिल्हाध्यक्ष निलेश रेडेकर, युवाध्यक्ष उत्तम पाटील, संतोष घाटगे, सूरज सुर्वे, संपदा मुळेकर, आदम शेख, राज कोरगावकर, प्रथमेश सूर्यवंशी, लखन काझी, विशाल वठारे, आदी कार्यकर्ते उपस्थित होते.