मुंबई: कोरोनाच्या संकटकाळात ग्रामीण भागातील गरीब रुग्ण शहरांमध्ये उपचारासाठी येण्याचे प्रमाण वाढण्याची शक्यता आहे. त्यामुळे मुंबईसह राज्यातील धर्मादाय रुग्णालयांमध्ये नियमाप्रमाणे दहा टक्के गरीब रुग्णांना मोफत उपचार द्यावे, असे स्पष्ट निर्देश याविषयी मंत्रालयात झालेल्या बैठकीत दिले आहेत.मुंबई शहर व राज्यातील धर्मादाय रुग्णालयांमध्ये १० टक्के गरीब रुग्णांना मोफत उपचारासंदर्भातील नियमांचे पालन करून उपचार द्यावेत. कोरोना महामारीच्या काळात ग्रामीण भागातील रुग्ण शहरात उपचारासाठी आले नाहीत. मात्र, आता रुग्ण उपचारासाठी येण्याचा ओघ वाढू शकतो. यासाठी धर्मादाय रुग्णालयांनी गरिबांना सहकार्य करून, त्यांची सेवा करावी, अशा सूचना विधी व न्याय विभागाच्या राज्यमंत्री आदिती तटकरे यांनी यावेळी केल्या.राज्यातील धर्मादाय रुग्णालयांमध्ये शासकीय नियमाप्रमाणे १० टक्के गरीब रुग्णांना मोफत उपचार देण्याच्या नियमांचे पालन करण्यासाठी मंत्रालयात बैठक झाली. त्यास दोन मंत्र्यांसह विधी व न्याय विभागाचे प्रधान सचिव आर. एन. लहा, धर्मादाय आयुक्त आर.एन. जोशी, महात्मा फुले जनआरोग्य योजनेचे मुख्य कार्यकारी अधिकारी सुधाकर शिंदे, विधी व न्याय विभागाचे सहसचिव नितीन जिवणे तसेच बॉम्बे, जसलोक, लिलावती, हिरानंदानी, सैफी, बिच कँडी, नानावटी, रहेजा, हिंदुजा, नायर, रिलायन्स, एसआरसीसी, गुरूनानक, मसीना, ग्लोबल, प्रिन्स अली खान, एच. एन. रिलायन्स अशा विविध धर्मादाय रुग्णालयांचे प्रतिनिधी यावेळी उपस्थित होते.कोरोना लॉकडाउनच्या काळात अनेक ग्रामीण रुग्णांना शहराकडे उपचारासाठी येता आले नाही. मात्र, अशा रुग्णांचा उपचार आणि शस्त्रक्रियेसाठी शहराकडे येण्याचा ओघ वाढू शकतो. ग्रामीण भागातून प्रवास करून आलेल्या गरीब जनतेला अडचणी भासू नयेत किंवा उपचारात उणिवा राहू नये, यासाठी समन्वय साधून त्यांना योग्य उपचार देणे गरजेचे आहे, असे राज्यमंत्री आदिती तटकरे यांनी सांगितले.रुग्णालय आणि रुग्ण यांच्यात संवाद आणि समन्वय असणे गरजेचे आहे. याबरोबरच रुग्णालयात उपलब्ध जागा आणि उपचारपद्धती याची माहितीही प्रथमदर्शनी रुग्णांना मिळणे गरजेचे आहे.रुग्णांना उपचारासाठी आवश्यक कागदपत्रांची माहिती आणि पूर्तता करण्यासाठी यंत्रणाही असणे आवश्यक असल्याचे तटकरे यांनी सांगितले. तसेच, रुग्णालयाला प्रशासकीय समस्या असतील तर त्यासाठी उच्चस्तरीय बैठक घेऊन समस्यांचे निराकरण करण्याचा प्रयत्न करण्यात येईल. रुग्णालयाला शासन सर्वोतोपरी सहकार्य करेल, असेही त्यांनी यावेळी रुग्णालयांच्या प्रतिनिधींना सांगितले.
Leave a Reply