चंद्रकांतदादांनी सायकल चालवून रॅलीत दर्शविला सहभाग

कोल्हापूर : कोल्हापूर स्पोर्टस क्लबच्यावतीने आज शहरातून काढण्यात आलेल्या सायकल रॅलीत जवळपास 150 हून अधिक सायकलपट्टू सहभागी झाले होते. या सर्व सायकलपट्टू समवेत पालकमंत्री चंद्राकांत पाटील यांनीही सायकल चालवून रॅलीत सहभाग घेतला. कोल्हापूरात होणाऱ्या ट्रायथ्लॉन आणि इयूथ्लॉन या आंतरराष्ट्रीय क्रीडास्पर्धा यशस्वी करण्याबरोबरच यामध्ये कोल्हापूरच्या खेळाडूंचा सहभाग वाढवावा, या दृष्टीनेही या क्लबने पुढाकार घ्यावा असे आवाहन त्यांनी केले.
आजच्या सायकल रॅलीमध्ये कोल्हापूर स्पोर्टस क्लबचे उपाध्यक्ष डॉ. विजय कुलकर्णी, सचिव उदय पाटील, खजिनदार आषिश तंबाके, वैभव बेळगांवकर, डॉ. संदेश बागडे, महेश कदम,आदित्य शिंदे यांच्यासह अनेक मान्यवर आणि लहान मुले-मुली तसेच महिला सायकलपट्टूं मोठया संख्येने उपस्थित होते. पर्यावरण आणि आरोग्यासाठी सायकलींग उपयुक्त असून घरोघरी सायकल असणे आरोग्याच्यादृष्टीने महत्वाचे असल्याचे मत पालकमंत्री चंद्रकांत पाटील यांनी आज येथे बोलतांना व्यक्त केले.
कोल्हापूर स्पोर्टस क्लबच्यावतीने आज शहरातून सायकल रॅली काढण्यात आली, या रॅलीचा शुभारंभ दसरा चौकातील राजर्षि शाहु महाराजांच्या पुतळयापासून पालकमंत्री चंद्रकांत पाटील यांच्या हस्ते पुष्पहार अर्पण करुन करण्यात आला. यावेळी ते बोलत होते. त्यांच्यासमवेत महापालिका आयुक्त डॉ. अभिजित चौधरी, शहर वाहतूक पोलीस निरिक्षक अशोक धुमाळ, कोल्हापूर स्पोर्टस क्लबचे अध्यक्ष चेतन चव्हाण, विश्वविजय खानविलकर, नगरसेवक राहुल माने यांच्यासह क्लबचे पदाधिकारी तसेच सायकलपट्टू मोठया संख्येने उपस्थित होते.
आरोग्यासाठी उपयुक्त ठरणाऱ्या सायकलिंगचे महत्व दिवसेंदिवस वाढत चालले असून पर्यावरण प्रदुषण रोखण्यासही सायकल अतिशय उपयुक्त असल्याचे सांगून पालकमंत्री चंद्रकांत पाटील म्हणाले की, देशासह राज्यातील अनेक शहरात आता सायकलसाठी स्वतंत्र ट्रॅक निर्माण होत असून जनतेने स्वत:च्या आणि कुटुंबियांच्या सदृढ आरोग्यासाठी आणि पर्यावरण प्रदुषण नियंत्रणासाठी सायकलचा अधिकाधिक वापर करणे काळाची गरज आहे. याबरोबरच पर्यावरण प्रदुषण नियंत्रणासाठी आठवडयातून एक दिवस नो व्हेईकल डे करणे गरजेचे आहे. तसेच नागरिकांनी खाजगी वाहनांचा वापर टाळून शकयतो सार्वजनिक वाहतूक व्यवस्थेचा अवलंब करण्यात पुढाकार घ्यावा, असे आवाहनही त्यांनी केले.
पर्यावरण आणि आरोग्यासाठी उपयुक्त ठरणाऱ्या सायकलिंगसाठी कोल्हापूर स्पोर्टस क्लबने घेतलेल्या पुढाकाराबद्दल संयोजकांना पालकमंत्री चंद्रकांत पाटील यांनी धन्यवाद दिले. यावेळी इंडिया, आशिया आणि युनिक बुक ऑफ रेकॉर्ड नोंदविणारा 6 वर्षाच्या वरद वैभव चंदगडकर व पृथ्वीराज शहापूरे याचा पालकमंत्री चंद्रकांत पाटील यांच्या हस्ते सत्कार करण्यात आला.
कोल्हापूर स्पोर्टस क्लबच्यावतीने ट्रायथ्लॉन आणि इयूथ्लॉन या आंतरराष्ट्रीय क्रीडास्पर्धा 29 ऑक्टोबरला प्रथमच कोल्हापूरात होत असून या स्पर्धेचे औचित्य साधून स्थानिक खेळाडूंचा यामध्ये अधिकाधिक सहभाग वाढविण्याच्या उद्देशाने आजची सायकल रॅली काढण्यात आल्याचे कोल्हापूर स्पोर्टस क्लबचे अध्यक्ष चेतन चव्हाण, विश्वविजय खानविलकर यांनी सांगितले. पालकमंत्री चंद्रकांत पाटील यांच्याहस्ते राजर्षि शाहू महाराजाच्या पुतळ्यास पुष्पहार अर्पण करुन दसरा चौकातून या रॅलीस प्रारंभ झाला. ही सायकल रॅली पुढे बिंदू चौक, कॉमर्स कॉलेज, उमा टॉकिज, राजारामपुरी रोड, उड्डाण पुल, कावळा नाका, धैर्यप्रसाद हॉल, जिल्हाधिकारी कार्यालयापासून पुन्हा दसरा चौकात या रॅलीचा समारोप झाला.