कोल्हापूरात शिवसेनेचे मंडलिक तर हातकणंगलेतून माने विजयी ?

कोल्हापूर : कोल्हापूर व हातकणंगले लोकसभा मतदारसंघात विद्यमान खासदारांना धक्का बसणार असे स्पष्ट संकेत होते. आणि पहिल्या फेरीपासून शिवसेनेच्या प्रा. मंडलिक यांनी मोठे आघाडी घेतली तर हातकणंगले मतदारसंघातून शिवसेनेचे धैर्यशील माने यांनी विद्यमान खासदार राजू शेट्टी यांना पिछाडीवर टाकले. विद्यमान खासदार धनंजय महाडिक यांच्यावर संजय मंडलिक यांनी तेराव्या फेरीअखेर एक लाख 96 हजार मतांनी निर्णायक आघाडी घेतली.
कोल्हापूर लोकसभा मतदारसंघाची मतमोजणी शासकीय धान्य गोदाम रमणमळा येथे तर हातकणांगले मतदारसंघाची मतमोजणी शासकीय गोदाम सरनोबतवाडी येथे सकाळी 8 पासून सुरू झाली. केंद्रावर कोणत्याही प्रकारचा गोंधळ होऊ नये यासाठी कडक पोलिस बंदोबस्त ठेवण्यात आला होता. राज्य पोलीस दल, राज्य राखीव दल, केंद्रीय पोलीस दल अशी तिहेरी व्यवस्था मतमोजणी केंद्रापासून दोनशे मीटर पर्यंत ठेवली होती.
संजय मंडलिक व धनंजय महाडिक यांच्यात अटीतटीची लढत होती. मात्र पहिल्या फेरीपासून संजय मंडलिक यांनी धनंजय महाडिक यांच्यावर मोठ्या आघाडी घेतली.
त्यांनी पहिल्या फेरीतच 19683 मतांची आघाडी घेतली. दुसऱ्या फेरीत आघाडी 34624 मतांनी मात केली. तिसऱ्या फेरीत 52135 मतांनी तर चौथ्या फेरीत शिवसेना उमेदवारांचे मताधिक्य वाढत राहिले. चौथ्या फेरीत मंडलिकांना 66981 मतांची आघाडी मिळाली पाचव्या फेरीत 83930 मतांची आघाडी मिळाली.
सहाव्या फेरीत मंडलिकांना 99 हजार 996 तर सातव्या फेरीत 1 लाख13 हजार 616 तर आठव्या फेरीत 1 लाख 22 हजार 842 मतांची आघाडी मिळाली.
राष्ट्रवादीचे विद्यमान खासदार धनंजय महाडिक यांच्यावर गेल्या वेळी झालेल्या पराभवाचा वचपा यावेळी काढणार हे येथे स्पष्ट झाले. कोल्हापूर लोकसभा मतदारसंघातील सर्व ही सहा विद्यमान सभा मतदार संघात मंडलिक यांनी निकटचे प्रतिस्पर्धी धनंजय महाडिक यांच्यावर आघाडी घेतली.
हातकणंगले मतदारसंघात राजू शेट्टी पुन्हा निसटती बाजी मारतील अशी आशा होती. मात्र सर्वच मतदारसंघात शिवसेनेचे धैर्यशील माने यांनी पहिल्या फेरीपासून आघाडी घेण्यास सुरुवात केली. पहिल्या फेरीतच धैर्यशील माने यांना 6340 चे मताधिक्य मिळाले. त्यांची गणितीय आघाडी वाढतच गेली.
दुसऱ्या फेरीत माने यांना 12 हजार 231 व तिसर्‍या फेरीअखेर धैर्यशील माने यांना 14 हजार 471 ,चौथ्या फेरीत 20 हजार 340,पाचव्या फेरीत 11हजार 964,सहाव्या फेरीत 14 हजार 224 मताधिक्य मिळाले. तेव्हाच हातकणंगलेचा निकाल धक्का देणारा ठरणार असे संकेत देऊन गेले.
यानंतर मताधिक्य वाढतच राहिले.सातव्या फेरीत 19 हजार 681 चे मताधिक्य तर आठव्या फेरीत 18 हजार 859,नवव्या फेरीत 25 हजार 134,दहाव्या फेरीत 30 हजार 66,अकराव्या फेरीत 32 हजार 425,बाराव्या फेरीत 42 हजार 275 ,तेराव्या फेरीत 42 हजार 622,चौदाव्या फेरीत 40 हजार 729,पंधराव्या फेरीत 39 हजार 110,सोळाव्या फेरीत 50 हजार 102 आणि सतराव्या फेरीत 50 हजार 758 मताधिक्य मिळले.
शेवट पर्यंत धैर्यशील माने यांचे मताधिक्य राजू शेट्टी यांना तोडता आले नाही. एकूणच मतदारांनी केंद्रात पुन्हा मोदी येण्यासाठी कोल्हापूर आणि हातकणंगले येथील दोन्ही जागांवर सेनेला निवडून दिले असल्याचे दिसून आले.