तरूणाईला समोर ठेऊन बनविलेला सिनेमा ‘गॅट मॅट’१६ नोव्हेंबरला प्रेक्षकांच्या भेटीला

‘कोल्हापूर: प्रेम म्हणजे, प्रेम म्हणजे प्रेम असतं… तुमचं आमचं सेम असतं…’ ही मंगेश पाडगावकरांची कविता प्रेमवीरांमध्ये प्रसिद्ध आहे. प्रेमात पाडणाऱ्या या कवितेने अनेकांचे ‘गॅट मॅट’ देखील जुळवून दिले आहे. मात्र, हे ‘गॅट मॅट’ जुळवताना अनेक मशागती कराव्या लागतात. आवडत्या व्यक्तीला प्रेमात पाडण्यासाठी, प्रेमवीरांकडून अनेक प्रयत्न केले जातात. मात्र, या प्रयत्नांत बऱ्याचदा धांदल उडवणारे किस्सेदेखील घडतात. याच किस्स्यांची मजेदार मेजवानी घेऊन आगामी ‘गॅटमॅट’ सिनेमा प्रेक्षकांच्या भेटीस येत आहे. अवधूत गुप्ते प्रस्तुत आणि यशराज इंडस्ट्रीज यांची निर्मिती असलेला हा सिनेमा येत्या १६ नोव्हेंबरपासून प्रेमवीरांचे ‘गॅटमॅट’ जुळवण्यास येत आहे.आज कोल्हापूर मध्ये चित्रपटाच्या संपूर्ण टीमने मुक्त संवाद साधला. महाविद्यालयातील तरुण तरूणींना समोर ठेऊन हा चित्रपट निर्मित केला आहे असे अवधूत गुप्ते यांनी सांगितले. तसेच यातून युवा पिढीला संदेश ही दिला गेला आहे.

कॉलेज विश्वाची रंजक सफर घडवून आणणाऱ्या या सिनेमाचे दिग्दर्शन निशीथ श्रीवास्तव यांनी केलं आहे. तरुणाईने बहरलेल्या या सिनेमाचा मुंबई येथे मोठ्या दिमाखात ट्रेलर लाँच करण्यात आला. संपूर्ण स्टारकास्टच्या उपस्थितीमध्ये पार पडलेल्या या सिनेमाच्या ट्रेलरने उपस्थितांची मनं तर जिंकलीच पण त्याचबरोबर सिनेमात नक्की काय पाहायला मिळणार याची उत्सुकता देखील निर्माण केली आहे. या ट्रेलरमधून अक्षय टंकसाळे, निखील वैरागर, रसिका सुनील आणि पूर्णिमा डे हे प्रमुख कलाकार आपल्याला दिसून येतात. तसेच रंग्या आणि बगळ्या या दोन मित्रांच्या ‘गॅट मॅट’ संस्थेचे चालणारे गमतीदार कामकाजदेखील प्रेक्षकांचे भरघोस मनोरंजन करते. मैत्री, प्रेम आणि रोमान्स दाखवणारे ‘गॅट मॅट’ सिनेमाचे हे ट्रेलर प्रेक्षकांना नॉस्टेलजीक करण्यास यशस्वी ठरत आहे. या सिनेमाच्या गमतीदार ट्रेलरबरोबरच, सिनेमातील गाणीदेखील प्रेक्षकांना मोहित करणारी आहेत. खास करून, या सिनेमातील शीर्षकगीताने तर तरुण वर्गाला खूळ लावलं आहे. सचिन पाठक लिखित, अवधूत गुप्ते यांच्या आवाजातलं हे शीर्षकगीत पॉपसंगितामध्ये मोडत असल्याकारणामुळे कॉलेज तरुणांसाठी ते पर्वणी ठरत आहे. शिवाय, अभिजित खणकर लिखित, आनंद शिंदे यांच्या दमदार आवाजातील ‘वरात’ हे गाणंदेखील सध्या तुफान गाजत आहे. या व्यतिरिक्त आणखीन काही गाणी या सिनेमात असून, तूर्तास ती गुलदस्त्यात ठेवण्यात आली आहेत. विशेष म्हणजे, या सिनेमातील सर्व गाण्यांना सुप्रसिद्ध संगीत दिग्दर्शक समीर साप्तीस्करचं संगीत लाभलं आहे. राजेंद्रप्रसाद श्रीवास्तव यांची निर्मिती असलेला हा सिनेमा, प्रेमात पडलेल्यांना आणि प्रेमात पडू इच्छिणाऱ्या प्रत्येक व्यक्तीसाठी मनोरंजनाची मेजवानी ठरणार आहे. त्यामुळे, प्रेक्षकदेखील या आगळ्यावेगळ्या ‘गॅट मॅट’ च्या प्रतीक्षेत असतील, हे निश्चित !