व्यसनमुक्ती संकल्प दिनानिमित्त रॅली: ह्रदया हॉस्पिटलचा उपक्रम

कोल्हापूर : नवीन वर्षाच्या सुरुवातीलाच म्हणजे १ जानेवारी हा दिवस व्यसन मुक्ती संकल्प दिन म्हणून साजरा करत आज  हेरले येथील ह्रदया हॉस्पिटलच्या वतीने व्यसन मुक्ती संकल्प रॅलीचे आयोजन करण्यात आले होते. रलीचे उद्घाटन महापौर अश्विनी रामाणे यांच्या हस्ते करण्यात आले.शहराच्या प्रमुख मार्गावरून ही मोटार सायकल रॅली काढण्यात आली. व्यसनमुक्तीचा संकल्प आजच्या तरुण पिढीने करावा यासाठी नवीन वर्षाची सुरुवात या सामाजिक उपक्रमाने करण्यात आली.

बदलती जीवन शैली,मनोरंजन साधनांचा वाढता प्रभाव सोशल नेटवर्क यामधून प्रसारित होणारी चुकीची माहिती यामुळे आजची पिढी व्यासनाच्या छायेत अडकत आहे.सिगारेट,ड्रग्ज,मद्यपान आणि तंबाखूजन्य पदार्थ सेवन करण्याचे प्रमाण तरुणांमध्ये वाढले आहे.१६ ते ३० वर्षे वयोगटात हे प्रमाण अधिक असल्याचे दिसून येते.अशा वेळी तरुणांमध्ये बंडखोरीची मानसिकता असते.ज्येष्ठ लोकांचे म्हणणे त्यांना ऐकायचे नसते.त्यामुळे त्यांना विश्वासात घेऊन योग्यवेळी मार्गदर्शन केले तर आजची पिढी नक्कीच व्यसनापासून लांब राहू शकेल.या व्यसनांमुळे कॅन्सर,हृदयरोग,किडनीचे आजार,पोटाचे विकार असे भयानक आजार उद्भवतात. यासाठीच पुढील संभाव्य धोके लक्ष्यात घेऊनच या रॅलीचे आयोजन केले होते.यावेळी व्यसन मुक्तीचे फलकही दर्शविण्यात आले होते. रॅलीमध्ये ह्रदया हॉस्पिटलच्या डॉ.सुरेखा चौगुले,डॉ.संतोष चौगुले यांच्यासह सर्व डॉक्टर्स,नर्स आणि कर्मचारी सहभागी झाले होते.